Alloh Azza wa-Jalla udeh kasih penjelasan tentang due Perjuangan :
Perjuangan Dzohir ame Perjuangan Batin.
Jihad Batin ntu perjuangan ngelawan hawa nafsu, watak nalurinye setan
serta tobat dari kemaksiatan, dose-dose, ame ninggalin hal-hal nyang nyenengin nyang diharomin.
Adapun Jihad Lahir ntu Jihad ngelawan orang-orang kafir
nyang belawanan ame Alloh dan RosulNye, melalui senjate dan berperang.
Jihad Batin ntu suse banget dibandingin Jihad Lahir, karena Jihad Batin ntu dilakuin
terus terusan dan menjadi keharusan.
Bagemane kaga suse ? Lantaran Jihad Batin berarti mutusin segale kecenderungan
nafsu nyang dilarang, ngejauhinnye, dan ngejalanin seluruh perinte Alloh
serta ngejauhin laranganNye.
Siape juge nyang bise ngedapetin perjuangan lahir batin berarti die ngedapetin
kemenangan dunie dan akhirat.
Luke-luke nyang menimpe jasad syuhade’, seperti luke ditangan, gak berase.
Adapun mati di tangan Mujahid nyang ngelawan nafsunye, nyang tobat dari dosenye,
laksane minuman dingin di mate orang nyang haus dahage.
Kaum Sufi, gak ade nyang ngebebanin, kecuali Alloh bakal ngasih sesuatu
nyang lebih baek dibanding beban kite.
Setiap saat mestinye punye makne khusus di ati untuk Alloh,
baek ade hubungannye ame perinte atawe laranganNye.
Beda ame kebanyakan makhluk dan orang-orang munafik nyang jadi musuh-musuh
Alloh Azza wa-Jalla, karena kebodohan dirinye terhadep kebenaran ame sikap
bermusuhannye terhadep Alloh Ta’ala, mereka masuk ke nerake.
Bagemane mereka kaga masuk nerake? Lantaran mereka di dunie belawanan
terhadep Alloh Ta’ala, ngikutin keselarasan nafsunye, egonye, tradisinye, setan-setannye, ngedahuluin kepentingan dunianye dibandingin akhiratnye.
Bagemane kaga masuk nerake? Mereka udeh ngedengerin ayat-ayat Al-Qur’an,
gak beriman, gak ngamalin perinteNye ame kagak ngejauhin laranganNye.
Beriman dong ame Qur’an ni, amalin dan ikhlas dalem ngamalinnnye,
kaga cuman betereak doang, dan jangan sampe kalian munafik dalem pelaksanaanye,
jangan sampe nyari pujian dari makhluk dan nyari bales budi.
Sedikit banget orang nyang beriman dan Qur’an diamalin bener-bener demi Wajah Alloh.
Lantaran ntu betape sedikitnye kaum mukhlisin/orang nyang ikhlas,
dan betape banyaknye orang nyang munafik.
Bahne betape kalian ni males banget ame ketaatan kepade Alloh Azza wa-Jalla,
justru kalian lebih doyan taat kepade musuh, yaitu setan.
Kaum Sufi senantiase ngarep, dalem detik-detiknye kaga lepas dari tugas-tugas
Alloh azza wa-Jalla.
Mereka ntu bener-bener nauin bahwa kesabaran ame tugas dan ketentuan-Nye
serta takdir-Nye, ntu peranti luapan kebaekkan dunia akhirat,
nyang berarti nyatu ame kehendak dan tindakan-Nye, kadang bersabar,
kadang juge bersyukur, kadang deket dan kadang ngerasa jauh,
kadang sibuk banget kadang juge berase enteng,
kadang kaya banget dan kadang melarat, kadang sehat kadang sakit.
Seluruhnye kaga lepas ame kebersamaannye ame Alloh Azza wa-Jalla.
Nah ntu nyang paling penting bagi kaum sufi, harepan bagi kesalametan die ame
keselametan makhluk nyang laen manakale lagi bersame Sang Kholiq Azza wa-Jalla,
dan die terus terusan mohon kepada Alloh bagi kemaslahatan manusie.
Jadiin dong ente mesti jejeg ame nyang bener, pasti deh ente pade besinar cemerlang.
Jika ente bener dalem hukum, ente fasih dalem pengetahuan.
Jika ente bener dalem batin, bakalan fasih dalem lahir.
Seluruh keselametan ade dalem ketaatan, yaitu ngejalanin perinte
dan ngejauhin larangan, sabar ame seluruh ketentuan-Nye.
Siape nyang mohon ijabeh dari Alloh maka Alloh Ta’ala akan ngijabahi,
siape nyang taat pada-Nye, maka seluruh makhluk juge taat ame die.
Nabi SAW bersabde:”Orang nyang beriman kaga bakalan sempurne keimanannye
sampe die kepengen agar sodarenye muslim ngedapetin ape nyang didapetinnye.”
Inilah sabde junjungan dan panutan kite, nyang ngebimbing kite dan ngasi syafaat kite.
Betape kesempurnaan iman jadi penghalang bagi orang nyang kaga mencintai sodarenye
nyang muslim sebagemane mencintai dirinye sendiri.
Kalo ente mencintai diri ente, ente bakalan make pakean nyang bagus, makan makanan
nyang paling lezat, rume yang gede, harte nyang banyak, kenape ente kaga bersikap
seperti ntu buat sahabat ente nyang muslim.
Berarti ente sungguh penduste, lantaran ente ngaku udeh sempurne iman ente.
Woy orang nyang mao mikir, lihatin tuh tetangge miskin, sedangkan ente punye harte.
Mereka wajib nerime zakat ente, bahkan setiap ari ente ngeruk untung,
bahkan sangat berlebih dari sekedar bekecukupan seari-ari, lalu ente ngalangin
atawe keberatan buat ngasi harte ente, sementare mereka juge si miskin ntu
tetep rela ame kekuarangannye.
Bahne karene hawa nafsu setan ade di belakang ente, nyang ngebuat ente suse
berbuat baek, manakale ambisi ente terus begolak buat harte dunie,
iman ame ketaqwaan sangat dikit, sungguh ente udeh ngelakonin kemusyrikan
lantaran harte dan sesame makhluk, sementare kaga ade kebaekan ame diri ente.
Sesiape aje nyang banyak kesenangannye pade dunie, ambisinye ngawur sampe lupe maut,
lupa kelak ketemu Alloh, kaga bise ngebedain nyang halal ame nyang haram,
sesungguhnye orang ntu udeh serupe ame orang-orang kafir.
Orang kafir ngomong:”Kaga ade pengecualian keidupan dunie, dimane kami mati dan idup.
Kaga ade nyang ngancurin kami kecuali sang waktu.” (Al-Jatsiyah 24)
Sekonyong-konyong ente ni seperti bagian dari mereka, cuma aje ente make baju Islam,
dan ente udeh ngalirin darah ente ame due syahadat, ente ikut sholat, puase,
cuman sebage tradisi kebiasaan doang, bukan sebage ibadah.
Tampaknye dimate khalayak ente orang nyang bertaqwe, sedangkan hati ente pengecut,
dan ntu same sekali kagak bergune.
Woy kaum sufi, sungguh mane bergune bagi ente, lapar ame dahage di siang ari,
sedang di malem ari ente memakan barang haram.
Puase di siang ari, maksiat di malem ari.
Ente nolak kaga minum di siang ari lalu ente berbuka ame darah kaum muslimin.
Diantare kalian puase di siang ari, fasiq di malem arinye.
Rosululloh SAW, bersabde:”Ummatku kaga bakalan hine sepanjang ngemuliain
bulan Romadhon.”(Hr Muslim)
Ngagungin bulan Romadhon ntu ame ketaqwaan, dan berpuase cuman buat Alloh Ta’ala
disertai ngejage batas syariat.
Berpuase deh, dan ketike berbuke, bagi-bagi ntu makanan ame kaum miskin.
Jangan ente makan sendirian, lantaran ente makan sendirian,
dikhawatirin ente ketimpe kesulitan ame kemiskinan.
Ente semue kenyang sementare tetangge ente lapar,
sedangkan ente ngaku sebage orang beriman.
Iman ente kaga sah, ketike makanan berlimpah sedangkan ade orang miskin
lagi di pintu lantas ente menolaknye.
Dalem sekejap kesebar deh tuh berite ente, dan sekejab ntu juge ente bise jato miskin,
Ente juge bise ditolak dimane-mane ketike meminte-minte.
Coba deh perhatiin! Semestinye ente inget due hal ape nyang ade di tangan
ame sekaligus tangan nyang laen ngasi.
Tawadhu’ (rende ati) ketike ente makmur, dan ngasi harte di bagian laen.
Nabi kita Sayyidina Muhammad SAW, ngasi orang nyang meminte ame tangannye sendiri,
dan beliau juge meres sendiri air susu onte, meres susu kambing, dan ngejahit bajunya.
Bagemane kalian ngaku ngikutin jejaknye, sedangkan ente justru belawanan ame beliau
baek dalem tindakan, ucapan ame perbuatan?
Ente buat pengakuan tanpe bukti? Kalo ente Yahudi sejati mestinye patuh banget
ame Taurat yang bener, begitu juge kalo ente muslim tulen mestinye
menuhin syarat-syarat ke-Islaman ente, kalo kaga, jangan ngaku-ngaku
sebage muslim tulen.
Mestinye ente menuhin syarat ke-Islaman, hakikat ke-Islaman,
yaitu nyerahin sepenuhnye diri ente di hadapan Alloh Azza wa-Jalla.
Peduli dong ame makhluk, sampai akhirnye Alloh peduli ame ente.
“Cintai orang nyang ade di muke bumi, sampe ade nyang mencintai ente
semue nyang di langit.”Sepanjang diri ente tegak ame sikap sok egois,
ente kaga bakalan sampe ke maqom ni.
Sepanjang ente masih melihare hasrat ame kesenangannye, ente bakalan kebelit
dalem tali iketannye, dan mencegah ente buat nyampe kepade ridho Alloh.
Karena ente cuman nyampe pade bagian ego nafsu doang ame keancurannye.
Hak nafsu ntu adalah seneng pesta, bepakean, minum dan tempat nyang nyaman
di dalemnya, bageannye adalah kelezatan dan syahwat.
Makanye ambil ame tangan syariat.
Sepanjang ente ngambil ntu menurut kadar ame kepastian dari Alloh Azza wa-Jalla,
maka boleh ente lakonin.
Duduk deh di pintu syariat dan berbakti, ente bakalan bahagie.
Alloh swt telah berfirman:“Ape nyang dateng dari Rosul,
maka ambillah dan ape nyang dilarang darinye, hindarilah.” (Al-Hasyr : 7)
Terimalah dengan seneng dan enteng, dan ceburin diri ente padenye.
Bilemane banyak nyang ente dapet dari kepastian-Nye, sebagemane ilmu-Nye,
maka disono ente berade.
Manekale entea nerime dengan gampang, ente kaga bakalan ancur,
bahkan kaga bakal pernah luput dari anugerah pemberian-Nye.
Hasan Al Bashri ngomong, “Cukup deh bagi orang nyang beriman, sekedar makanan ringan,
cukup deh kurma jelek ame seteguk aer.”
Orang nyang beriman ntu makan buat kekuatan tubuh doang, orang nyang munafik makan
buat dinikmatin.
Orang nyang beriman perlu makanan karena die butuh kekuatan ngelewatin jalan
menuju tempat, dimane tempat ntu justru seluruh kebutuhannye tercukupi,
karenenye die makan cuman sekedar buat kuat doang.
Sedang orang nyang munafik memang kaga punye tempat, kaga punye tujuan idup.
Betape banyak ari-ari ame bulan ente teledor. Usia ente potong kaga bemanfaat.
Ente kaga teledor ame dunie, sementare ente teledor ame igame.
Bebalik deh, ente bakalan jejeg pade kebeneran.
Dunie kaga bakalan abadi bagi siape juge, begitu juge bagi ente.
Ape ente masih punye harepan idup bersame Alloh Azza wa-Jalla?
Oh betape dikitnye pikiran ente. Betape banyak orang nyang numpuk dunienye,
ngebangun dunienye, sementare di sisi laen die ngerobohin bangunan akheratnye,
ame ngumpulin dunie dan ngebuang igamenye.
Bener-bener sandiware kejadian antare dirinye ame Alloh Azza wa-Jalla,
die malahan dendam kepade Tuhannye dan lebih ridho kepade makhluk-Nye.
Kalo die tau bakal mati dalem waktu deket, hadir di hadepan-Nye, die juge dihisab
atas seluruh perbuatannye, maka kaga ade nyang banyak dari jumle amalnye.
Dari Luqmanul Hakim RA, ngomong ame anaknye, “Eh bocah, sebagemane rase sakit,
ente kaga tau gimane datengnye penyakit.
Demikian juge mati dan ente kaga tau gimane mati nanti .
”Abah kasih peringatan ame ente dan hindarin, tapi kalo ente kaga perne perhatiin,
kaga perne ngindarin, ente bakalan lenyap dari kebaekan, sibuk ame dunie,
sebentar lagi ente tue, dan dunie kaga ade gunanye, bahkan semue nyang ente kumpulin
jadi beban.
Eh bocah, semestinye ente lakonin tugas dan mutusin kejahatan.
Kalimat kejahatan bakalan bercabang, jika ente ngomong, lalu saling bersahutan,
dateng juge kalimat nyang same, lalu hadir keburukan.
Cuman sedikit makhluk nyang ngajak ke pintu Alloh Azza wa-Jalla,
dan mereka ni sebage bukti dan alesan kebeneran ame mereka.
Jika masyarakat kaga nerime, maka kaum mukmin bakalan dapetin sebage nikmat,
tapi derite bagi kaum munafik, mereka ni adalah musuh-musuh Alloh Azza wa-Jalla.
Ya Allah semoga Engkau berikan kebajikan bersama Tauhid,
dan sirnakan kami dari makhluk dan selain DiriMu secara total.
Woy orang nyang bertauhid, woy orang nyang masih musyrik, sesungguhnye di tangan
para makhluk ntu kaga berarti ape-ape.
Sebuah kemuliaan di mate penguase, para raja, orang-orang kaye,
semue ntu hakikatnye di tangan Alloh SWT.
Hati mereka berade di Tangan-Nye, tersere Die ngebolak balikinnye.
”Kaga ade sesuatu juge nyang menyamai-Nye,
dan Die Maha Ngedenger dan Ngeliat.” (Asy-Syuuro : 11)
Jangan manjain diri ente,die bise makan jiwa ente, seperti orang nyang ngedidik anjing
dan ngemanjainnye, suatu ketike lengah anjing ntu bakalan ngemangsanye juge.
Jangan ente ngandelin senjate nafsu dan jangan juge mengasah ketajemannye,
karena bakalan ngenain diri ente di wadah keancuran ketike nafsu ngekhianatin ente.
Potong deh isi nafsu dan jangan ngelewatin syahwatnye.
Ya Alloh tolonglah kami atas nafsu-nafsu kami.
Ya Tuhan berikanlah kami kebajikan di dunia
dan kebajikan di akhirat,
dan lindungilah kami dari azab neraka.
0 komentar:
Posting Komentar